ಕನಕಪುರ ಕ್ಷೇತ್ರದಲ್ಲಿ ಶೇ 84.73 ಮತದಾನ

ಕನಕಪುರ: ರಾಜ್ಯದಲ್ಲೇ ಹೈ ವೋಲ್ಟೇಜ್ ಕ್ಷೇತ್ರ ಬೆಂಗಳೂರು ಗ್ರಾಮಾಂತರ ಲೋಕಸಭಾ ಕ್ಷೇತ್ರದ ಕನಕಪುರ ವಿಧಾನಸಭಾ ಕ್ಷೇತ್ರದಲ್ಲಿ ಶಾಂತಿಯುತ ಮತದಾನ ನಡೆದಿದೆ.

ಮಧ್ಯಾಹ್ನ ಬಿರುಬಿಸಿಲಿನಿಂದ ಮತದಾನ ಮಂದಗತಿಯಲ್ಲಿ ಸಾಗಿತ್ತು. ಬಿಸಿಲಿನ ತಾಪಕ್ಕೆ ಜನ ಮತಗಟ್ಟೆಗಳತ್ತ ಬರದೆ, ಮನೆಯಲ್ಲೇ ಉಳಿದಿದ್ದರು. ಮತ್ತೆ 3 ಗಂಟೆ ಬಳಿಕ ಚುರುಕುಗೋಂಡು ಸಂಜೆ 6 ಗಂಟೆಯವರೆಗೂ ಬಿರುಸಿನ ಮತದಾನ ನಡೆಯಿತು. ಬೆಳಿಗ್ಗೆ 7ರಿಂದ ಸಂಜೆ 6 ಗಂಟೆವರೆಗೂ ಶೇ. 84.73 ಮತದಾನ ನಡೆದಿದೆ.

ತಾಲೂಕಿನ 297 ಮತಗಟ್ಟೆಗಳ ಪೈಕಿ ಬೆಳಗ್ಗೆ 9 ಮತಗಟ್ಟೆಗಳಲ್ಲಿ ವಿವಿ ಪ್ಯಾಟ್ ಗಳಲ್ಲಿ ದೋಷ ಕಂಡು ಬಂದಿತ್ತು. ಕೂಡಲೇ ಸಂಬಂಧ ಪಟ್ಟ ಅಧಿಕಾರಿಗಳು ಬಂದು ಸರಿಪಡಿಸಿದರು. ತಾಲೂಕಿನ ಹನುಮನಹಳ್ಳಿ ಮತಗಟ್ಟೆಯಲ್ಲಿ ಕೊನೆ ಕ್ಷಣದಲ್ಲಿ ಇವಿಎಂ ಯಂತ್ರದಲ್ಲಿ ದೋಷ ಕಂಡು ಬಂದು, ಕೂಡಲೇ ಬದಲಿಸಿದರೂ, ಮತಗಟ್ಟೆಯಲ್ಲಿ ಒಂದು ಗಂಟೆಗೂ ಹೆಚ್ಚು ಕಾಲ ಮತದಾನ ವಿಳಂಬವಾದರೂ ಮತದಾರರು ತಾಳ್ಮೆಯಿಂದ ಕಾದು ಸರದಿಯಲ್ಲಿ ನಿಂತು ಮತದಾನ ಮಾಡಿದರು.

ಶುಕ್ರವಾರ ಬೆಳಿಗ್ಗೆ 7 ಗಂಟೆಯಿಂದ ಸಂಜೆ 6 ಗಂಟೆಯವರೆಗೂ ಎಲ್ಲೆಡೆ ಶಾಂತಿಯುತ ಮತದಾನ ನಡೆದಿದ್ದು ಲೋಕಸಭಾ ಚುನಾವಣೆ ಅಭ್ಯರ್ಥಿಗಳ ಭವಿಷ್ಯ ಮತ ಪೆಟ್ಟಿಗೆ ಸೇರಿದೆ. ಮತಗಟ್ಟೆ ಅಧಿಕಾರಿಗಳು ವಿದ್ಯುನ್ಮಾನ ಮತ ಯಂತ್ರ ಗಳನ್ನು ಸೀಲ್ ಮಾಡಿ ಸೂಕ್ತ ಭದ್ರತೆಯೊಂದಿಗೆ ರೂರಲ್ ಕಾಲೇಜು ಆವರಣದಲ್ಲಿರುವ ಕಂಟ್ರೋಲ್ ರೂಂಗೆ ತಂದು ಅಲ್ಲಿಂದ ಜಿಲ್ಲಾ ಕೇಂದ್ರದ ಕಂಟ್ರೋಲ್ ರೂಂಗೆ ಕೊಂಡೊಯ್ಯಲಾಗಿದೆ. ಜೂನ್ 4ರಂದು ಮತ ಎಣಿಕೆ ನಡೆದು ಫಲಿತಾಂಶ ಹೊರ ಬೀಳಲಿದ್ದು ವಿಜಯ ಮಾಲೆ ಯಾರ ಕೊರಳಿಗೆ ಧರಿಸಲಿದೆಯೋ ಕಾದು ನೋಡಬೇಕಿದೆ.ಬಾಕ್ಸ್‌ ವಿತ್‌ ಫೋಟೋ........

ಮತದಾನ ಮಾಡಲು ನಿರಾಸಕ್ತಿ, ಮತ್ತಿನ್ನೇನೋ ನೆಪ ಹೇಳುವವರನ್ನು ನಾಚಿಸುವಂತೆ ತಾಲೂಕಿನ ಕೋಡಿಹಳ್ಳಿ ಹೋಬಳಿಯ ಗುಡ್ಡೆ ವೀರನಹೊಸಹಳ್ಳಿಯ ಶತಾಯುಷಿ ವೆಂಕಟಮ್ಮ ರಾಮನಗರ ವಿಧಾನಸಭಾ ಕ್ಷೇತ್ರದ ಮರಳವಾಡಿ ಗ್ರಾಮದಲ್ಲಿ ನೆಲೆಸಿರುವ ಈಕೆ, ಮಗನ ಕುಟುಂಬದೊಂದಿಗೆ ಮತದಾನ ಮಾಡಲೇಬೇಕೆಂದು ಪಟ್ಟು ಹಿಡಿದು ಬಾಡಿಗೆ ಕಾರು ಮಾಡಿ ಕೊಂಡು ಸ್ವಗ್ರಾಮ ಗುಡ್ಡೆ ವೀರನಹೊಸಹಳ್ಳಿಗೆ ತಮ್ಮ ಮೊಮ್ಮಗ ರಾಜಾಚಾರಿ ಜೊತೆಯಲ್ಲಿ ಮತಗಟ್ಟೆಗೆ ಬಂದು ಮತದಾನ ಮಾಡಿ ಇಂದಿನ ಯುವಜನತೆಗೆ ಮಾದರಿಯಾದರು.ಕೆ ಕೆ ಪಿ ಸುದ್ದಿ 01:ಕನಕಪುರ ತಾಲೂಕಿನ ಗುಡ್ಡೆ ವೀರನಹೊಸಹಳ್ಳಿಯಲ್ಲಿ ಶತಾಯುಷಿ ವೆಂಕಟಮ್ಮ 40 ಕಿಲೋ ಮೀಟರದ ರಾಮನಗರ ತಾಲೂಕಿನ ಮರಳವಾಡಿ ಗ್ರಾಮದಿಂದ ಬಂದು ಮತ ಚಲಾಯಿಸಿದರು.