ವಿಜೃಂಭಣೆಯ ಬೈಲೂರು ಮಾರಮ್ಮ ಜಾತ್ರಾ ಮಹೋತ್ಸವ

ಕನ್ನಡಪ್ರಭ ವಾರ್ತೆ ಹನೂರುತಾಲೂಕಿನ ಬೈಲೂರು ಗ್ರಾಮದೇವತೆಯ ಮಾರಮ್ಮ ಜಾತ್ರಾ ಮಹೋತ್ಸವ ವಿಜೃಂಭಣೆಯಿಂದ ಜರುಗಿತು. ಹನೂರು ತಾಲೂಕಿನ ಕಾಡಂಚಿನ ಗ್ರಾಮಗಳಾದ ಬೈಲೂರು, ಹೊಸಪಾಳ್ಯ, ಕೆರೆದೊಡ್ಡಿ, ಗಾಂಧಿನಗರ , ಅಂಟಿಗಾಪಾಳ್ಯ ಐದು ಗ್ರಾಮಗಳಿಗೆ ನಡೆಯುವ ಜಾತ್ರಾ ಮಹೋತ್ಸವಕ್ಕೆ ದೂರದ ಊರುಗಳಿಂದ ಭಕ್ತರು ಅಪಾರ ಸಂಖ್ಯೆಯಲ್ಲಿ ಆಗಮಿಸಿದ್ದರು. ಬೇಸಿಗೆ ಮುಗಿಯುತ್ತಿರುವ ಹಾಗೂ ಮುಂಗಾರು ಮಳೆಯ ಆಗಮನದ ಮುನ್ನಾ ಯುಗಾದಿ ಹಬ್ಬದ ನಂತರ ಬಹಳ ಭಕ್ತಿಭಾವದಿಂದ ಹಾಗೂ ವಿಜೃಂಭಣೆಯಿಂದ ನಡೆಯುವ ಜಾತ್ರಾ ಮಹೋತ್ಸವ ಇದಾಗಿದೆ.

ಬೈಲೂರು ಮಾರಮ್ಮನ ಜಾತ್ರಾ ಮಾಹೋತ್ಸವಕ್ಕೆ ಸುತ್ತಮುತ್ತಲಿನ ಸಹಸ್ರಾರು ಭಕ್ತರು ಭಕ್ತಿಯಿಂದ ಎಳೆನೀರು ಮಜ್ಜನದ ತಂಪು ಸೇವೆಗೈಯುವುದು ಇಲ್ಲಿನ ಸಂಪ್ರದಾಯವಾಗಿದೆ. ಮಂಗಳವಾರ ರಾತ್ರಿ ಗುಡ್ಡೆ ಮಾರಮ್ಮನ ದೇವಾಲಯದ ಮುಂಭಾಗ ಕಾಡಂಚಿ‌ನ ಗ್ರಾಮಗಳಲ್ಲಿನ ಸೋಲಿಗರು ಭಕ್ತಿಯ ನೃತ್ಯ ಪ್ರದರ್ಶನಗೈದರು. ನಂತರ ಇಡೀ ರಾತ್ರಿ ಜಾಗರಣೆಗೈದು ಮುಂಜಾನೆ 5 ಗಂಟೆ ವೇಳೆಯಲ್ಲಿ ಗುಡ್ಡೆ ಮಾರಮ್ಮ ಹಾಗೂ ಮಾರಮ್ಮ ಇಬ್ಬರೂ ದೇವರು ಹಿಂಬದಿ ಚಲಿಸುತ್ತಾ ಭಕ್ತರೊಂದಿಗೆ ಸಾಗಿದರು.