ದ.ಕ.: ಸುಡುಬಿಸಿಲಿನ ನಡುವೆ ಬಿರುಸಿನ ಮತದಾನ

ಕನ್ನಡಪ್ರಭ ವಾರ್ತೆ ಮಂಗಳೂರು

ದ.ಕ.ಜಿಲ್ಲೆಯಾದ್ಯಂತ ಬೆಳಗ್ಗಿನಿಂದಲೇ ಬಿರುಸಿನ ಮತದಾನ ಆರಂಭವಾಗಿತ್ತು. ಮತದಾನ ಆರಂಭದ ಅರ್ಧ ತಾಸು ಮೊದಲೇ ಬಹುತೇಕ ಗ್ರಾಮೀಣ ಭಾಗದಲ್ಲಿ ಮತದಾರರು ಸರದಿ ಸಾಲಿನಲ್ಲಿ ನಿಂತಿದ್ದರು. 7 ಗಂಟೆಗೆ ಮತದಾನ ಆರಂಭವಾದಂತೆಯೇ ಮತದಾರರೂ ಹೆಚ್ಚಿನ ಸಂಖ್ಯೆಯಲ್ಲಿ ಮತಗಟ್ಟೆಗೆ ಬರುತ್ತಿದ್ದರು. 11 ಗಂಟೆ ಬಳಿಕ 3 ಗಂಟೆ ವರೆಗೆ ಮತದಾನ ಮಂದಗತಿಯಲ್ಲಿ ನಡೆಯಿತು. ಬಳಿಕ ಮತ್ತೆ ಉತ್ಸಾಹದಿಂದ ಮತಗಟ್ಟೆಗೆ ಬಂದು ಮತ ಚಲಾಯಿಸುತ್ತಿದ್ದುದು ಕಂಡುಬಂತು.

ಮತದಾನದಲ್ಲಿ ದ.ಕ.ಜಿಲ್ಲೆ ರಾಜ್ಯದಲ್ಲೇ ಸಂಜೆ 3 ಗಂಟೆ ವರೆಗೆ ಗರಿಷ್ಠ ಮುನ್ನಡೆ ಕಾಯ್ದುಕೊಂಡಿತ್ತು. ಬೆಳಗ್ಗೆ 9 ಗಂಟೆಗೆ ಶೇ.14.33 ಮತದಾನವಾಗಿದ್ದರೆ, 11 ಗಂಟೆಗೆ ಶೇ. 30.96, ಮಧ್ಯಾಹ್ನ 1 ಗಂಟೆಗೆ ಶೇ. 48.1, ಸಂಜೆ 3 ಗಂಟೆಗೆ ಶೇ. 58.65 ಹಾಗೂ ಸಂಜೆ 5 ಗಂಟೆಗೆ ಶೇ.71.83 ಮತದಾನ ದಾಖಲಾಗಿದೆ. ಬೆಳ್ತಂಗಡಿಯಲ್ಲಿ ಶೇ.75.59, ಮೂಡುಬಿದಿರೆ ಶೇ. 68.62, ಮಂಗಳೂರು ಉತ್ತರ ಶೇ.69.75, ಮಂಗಳೂರು ದಕ್ಷಿಣ ಶೇ.61.81, ಮಂಗಳೂರು ಶೇ.73.45, ಬಂಟ್ವಾಳ ಶೇ.73.69, ಪುತ್ತೂರು ಶೇ.75.2, ಸುಳ್ಯ ಶೇ.78.35 ಮತದಾನ ದಾಖಲಾಗಿದೆ.